![](https://i0.wp.com/www.thenepaltop.com/wp-content/uploads/2023/07/Untitled-design-2023-07-13T094034.690.png?fit=1000%2C562&ssl=1)
काठमाडौँ । आर्थिक वर्ष २०८०/८१ को राजस्व र व्ययको वार्षिक अनुमान रकम (बजेट) सङ्घीय संसद्का दुवै सदनबाट पारित भएको छ ।
राष्ट्रियसभाको आजको बैठकले प्रतिनिधिसभाबाट सन्देशसहित प्राप्त विनियोजन विधेयक, २०८० बहुमतले पारित गरेको हो । सरकार अर्थमन्त्री प्रकाश शरण महतले गएको १५ जेठमा सो बजेट प्रतिनिधिसभा र राष्ट्रिय सभाको संयुक्त बैठकमा प्रस्तुत गरेका थिए ।
आजको बैठकमा अर्थमन्त्री डा प्रकाश शरण महतले प्रतिनिधिसभाबाट सन्देशसहित प्राप्त ‘विनियोजन विधेयक, २०८० लाई पारित गरियोस्’ भन्ने प्रस्ताव प्रस्तुत गरेका थिए । त्यसअघि विनियोजन विधेयक, २०८० अन्तर्गत विभिन्न शीर्षकमा प्रस्तुत खर्च कटौतीको प्रस्ताव बहुमतले अस्वीकृत भएको थियो ।
बैठकमा विनियोजन विधेयक, २०८० अन्तर्गत विभिन्न शीर्षकमाथिको छलफलमा उठेका प्रश्नका सम्बन्धित मन्त्रीले जवाफ दिएका थिए ।
प्रतिनिधिसभाबाट १३ आषाढमा आगामी आवको बजेट पारित भएको थियो । । सङ्घीय संसद्का दुवै सदनबाट बजेट पारित भएसँगै आगामी साउन १ गतेदेखि बजेट कार्यान्वयनको बाटो खुलेको छ ।
विवादमा रहेको बजेटमा लामो समयसम्म प्रतिनिधिसभामा छलफल चलेको थियो । बजेटमा छलफल भए पनि बजेट जस्ताको त्यस्तै पास भएको हो । अगामी आर्थिक वर्षको बजेटलाई लिएर सरकारको आयुमा समेत प्रश्न तिह् खडा भएको थियो । सरकारमा रहेका सत्ताधारी दलहरूले नै सरकारले ल्याएको आगामी आर्थिक वर्षको बजेट सीमित जिल्लामा मात्रै भएको भन्दै सरकारले बजेट नसच्याए सरकारको सरकारलाई दिएको समर्थनका विषयमा सोच्नु पर्ने बताएका थिए ।
विभिन्न विवादका माझमा सरकारको आगामी आर्थिक वर्षको बजेट आज पारित भएसँगै बजेटका विषयमा लिएर सरकारको आयुमा उठेका प्रश्नहरू भने सेलाएका छन् ।